【中国点点点──闲话粤语#23】多情自古唱粤讴
2017-04-07

介绍过「摸鱼歌」、「南音」,程美宝教授今集就详细介绍何谓「粤讴」。咪以为今时今日少人讲起少人唱就代表粤讴息微,其实粤讴嘅内容,同呢个年代盛行嘅广东话K歌有异曲同工之妙。



呢只曲种自嘉庆道光年间开始兴起,系珠江花艇上,歌姬用粤语创制嘅一种曲调,内容多为男女之情。程美宝教授搵到一本古籍叫《粤讴》,系喺道光八年,亦即公元1828年9月出版,由「铭山」所编纂,「铭山」嘅真实身份就系一位名为「招子庸」嘅文人。

招子庸系南海横沙人,系嘉庆21年 (1816年) 嘅举人,做过山东几个地方嘅知县。《粤讴》就系招子庸经过加以雅化、修饰之后嘅一部粤讴集合。当时呢本书喺广东省城西关出版,其后一纸风行,一版再版,成为今日仍然流传嘅粤讴文本。

程美宝教授话,粤讴最大嘅特色,就系内容同用词,以至演绎嘅音调,都「抵死缠绵」,尽显男女之间嘅爱恨交缠。程美宝更即场演绎其中一首粤讴,大家一齐欣赏一下:

《累世》

真,真正累世。乜得你咁收人。

枉费你妹,从前个一片心。

多端扭计,你妹情愿受困。

思前想后,试睇待薄过你唔曾?

做乜兮离咁耐哩,就学王魁咁薄行?

我之要问明,边一个唆搅你之系自己生心?

兵行诡路,你妹心唔忿。

唉,情可恨。

一刀斩斩断两橛,丢开你妹唔使挂恨啐。

舍得我待郎敢样子,心事愁冇个至爱情人。

 


中国点点点星期一至五 下午三点至四点半

编导:张凤萍

监制:叶冠霖

【中国点点点】张凤萍、黄晓玲、唐伟杰、刘锐绍、郑汉良、吕秉权主持。每日话题由中国政情、至网络热话、旅游、生活、阅读,让听众轻轻松松,每天对祖国知多一点点。

常设环节

星期一:最紧要识法

星期二:对谈中国

星期三:中国讨论区;同声同气谈天说地

星期四:点点评论;阅读中国

星期五:漫游中国;闲话粤语

专题分类:中国热话
发表评论

最新专题