【中国点点点──闲话粤语#28】外江佬敲自由钟
2017-05-16

上集提到清朝嘅广东人爱用粤讴讽刺时弊,有人写咗一首《颠地鬼》「唱衰」做鸦片贸易嘅西洋商人。今次香港城市大学中文及历史学系教授程美宝带我哋去到几十年后嘅晚清,睇吓步入动乱岁月嘅人民,如何用粤讴抒发忧国忧民之心。

 



程美宝教授话,《颠地鬼》属于较早期流传嘅粤讴,所以系靠口耳相传,后期再有人手抄流传到后世。

但去到晩清,随着印刷技术逐渐成熟,民间出现「新媒体」──报纸。十九世纪中叶,亦即清同治年间,出现「铅印」(活字印刷),以及更重要嘅「石印」技术,令报纸可以大量印刷,而唔系以往嘅木刻技术。

报纸成为大众媒体,粤讴亦都有载体可以喺民间流通。程美宝指出,当时嘅报人会以粤讴、南音作为一种表达方式,灌输新闻内容到歌词当中。佢就为我哋拣嚟一首《珠江月》,系由笔名「外江佬」嘅文人所撰写。

歌词开首系讲欣赏珠江月色,但只为抛砖引玉,整首粤讴嘅「戏肉」系慨叹晚清中国嘅乱象,希望明白歌词嘅人可以企出嚟捍卫国家,争取更自由嘅政体。程美宝指出,晚清嘅民间流行一个象征──「自由钟」,唔少晚清嘅杂志如果有插图,就会见到呢个「自由钟」,寓意敲醒国民,改变国家。《珠江月》都有出现呢个象征。

以下系《珠江月》原文 (节录):

珠江月,照住船头。

你坐在船头,听我唱句粤讴。

 

人哋唱个啲粤讴,都唔系旧。

我就新名词谱出,替你散吓蝶怨蜂愁。

你听到个阵款款深情,就算你系铁石心肠,亦都会仰着天嚟搔吓首。

舍得我铜琵铁笛,重怕唔唤得起你敌忾同仇。

 

只为我中国沦亡,四万万同胞问边一个来救?

等到瓜分时候,个阵就任你边个都要作佢嘅马牛。

你睇我咁好河山,如锦綉。

做乜都无个英雄独立,撞一吓钟,嚟唱一下自由。

 


中国点点点星期一至五 下午三点至四点半

编导:张凤萍

监制:叶冠霖

【中国点点点】张凤萍、黄晓玲、王磊、刘锐绍、郑汉良、吕秉权主持。每日话题由中国政情、至网络热话、旅游、生活、阅读,让听众轻轻松松,每天对祖国知多一点点。

常设环节

星期一:最紧要识法

星期二:对谈中国

星期三:中国讨论区;同声同气谈天说地

星期四:点点评论;阅读中国

星期五:漫游中国;闲话粤语

专题分类:中国热话
发表评论

最新专题