【中国点点点──闲话粤语#31】花旗毒计齐拒约
2017-06-02

今时今日,华人地位逐渐提升,同往日被歧视、被排斥嘅日子渐行渐远。但无论喺咩年代,遇上排华举动,中国人都会群起抗争。

十九世纪末,美国政府推动排华法案,就触发旅美华侨一连串嘅反抗、示威,后来更演变出「拒约运动」。当时喺广州嘅华人如何用粤讴讽刺美国人嘅政策呢?



香港城市大学中文及历史学系教授程美宝今集搵嚟一首名为《除是冇血》嘅粤讴,歌名似乎语焉不详,但内容就将作者嘅愤怒表露无遗。

呢首歌刊载喺1905年5月31日出版嘅《广东日报》附刊《一声钟》,即刻睇吓歌词全文:

《除是冇血》

除是冇血,边得话唔嬲!

君呀!你睇吓花旗,几毒嘅计谋!

 

条条禁约,总总唔相就。

要把我哋华人,逐个个去收。

计吓二十年来,嗰啲咸苦捱够。

望到呢阵从新订约,点好重爱惜咙喉。

 

快啲商量抵制,开吓个同胞口。

有四万万人声,不必靠到满洲。

 

第一要把佢货物唔销,等佢知吓伯爷系老豆。

不久佢哋个工人喊苦,就要把我哋哀求。

嗰阵我只耳仔冇得闲,游了去别埠。

好似阿跛踢燕,一味唔兜。

 

佢一日唔肯转心,我一日唔肯罢手。

唉!真正抵手,此计系谁人扭?

舍得大众都系咁齐心,怕乜共佢对头。

美国政府嘅排华法案 (Exclusion Act),其实喺1882年已经实施,旨在暂缓华人移民到美国嘅申请,喺跟住落嚟嘅十几二十年,美国多次收紧法案内容,更进一步限制华人逗留美国嘅时间及移民申请嘅难度。

喺1884年,美国要求清政府签订限制华工到美国嘅条约,禁止新去美国嘅华人入境,原定10年期满嘅条约,后来被美国两次自行续约,到1904年,中国曾要求废约,但美国提出续订新约,引发中国民众反弹,「拒约反美运动」应运而生。

直到光绪31年,亦即1905年嘅5月10号,上海总商会号召全国各地工人,如果两个月内美国不肯废约,就会实行抵制美货。大家可以见到《除是冇血》当中,有提到「快啲商量抵制,开吓个同胞口。有四万万人声,不必靠到满洲。」可见当时文人希望透过媒体嘅影响力,令民众群起反抗,亦都觉得唔需要靠积弱嘅清政府。而历史嘅变化亦都证明,当时文人们嘅谂法冇错,因为清政府受唔住美国驻华领事嘅压力,反过嚟镇压中国国内嘅反美运动,更拘捕「拒约会」发起人。

但呢种动用媒体带起舆论嘅力量,已经成为不可逆转嘅模式,对几年后清皇朝嘅覆灭,立上一尊踏脚之石。

 


中国点点点星期一至五 下午三点至四点半

编导:张凤萍

监制:叶冠霖

【中国点点点】张凤萍、黄晓玲、王磊、刘锐绍、郑汉良、吕秉权主持。每日话题由中国政情、至网络热话、旅游、生活、阅读,让听众轻轻松松,每天对祖国知多一点点。

常设环节

星期一:最紧要识法

星期二:对谈中国

星期三:中国讨论区;同声同气谈天说地

星期四:点点评论;阅读中国

星期五:漫游中国;闲话粤语

专题分类:中国热话
发表评论

最新专题