【中国点点点──闲话粤语#33】团结抵制好办事
2017-06-16

1905年嘅「拒约运动」触发万千中国民众抵制美货,但上集《闲话粤语》同大家提过,并唔系所有人都系真心真意参与抵制,可能只系为咗迎合大众,以免激起民愤,所以逼住参与。

民心难一致团结,当时嘅热血青年亦都为此感到有啲沮丧,佢哋如何用粤讴抒发呢?



程美宝教授今集就同我哋介绍一首粤讴,名叫《听见话抵制》,系讲当时推动抵制行动嘅人,希望用文字触动民众,鼓励佢哋唔好放弃抵制,团结一致枪口对外。

《听见话抵制》 词:桂侣

听见话抵制,已有半年多。

做乜中华廿一省,都奈佢唔何?

 

团体总要结成,呢阵有谁个打破,

重要坚持到底,咪个咁就收科。

喺清末,陆续有人为推动社会运动,而结成一个个「团体」,呢种结社模式,系一种新现象,而「团体」对当时而言亦系一个新词汇。

记得系拒约勿负初终,唔好懈惰。

至怕嗰啲血凉动物,自己蹉跎。

呢度提到嘅血凉动物,相比起「冷血动物」,啲血热少少,但系都系无好积极参与呢场运动,程美宝表示,呢度系意有所指,指责当时一啲嘅商家、官员违背承诺,冇主动抵制美货,变咗喺度蹉跎岁月。

你哋睇吓嗰个冯君殉约,咁就声名播。

若果你哋全无思想,问你点对得住嗰三位哥哥 (指马、潘、夏)

眼见民众同官府都有啲冷淡,唔少热血青年都好心急如焚,担心拒约运动无疾而终。而上面提到嘅冯君,全名冯夏威 (1881-1905),佢系南海沙头人,1895年跟随父亲到美国做铁路苦工。1905年,冯夏威回国参加拒约运动,喺上海美国总领事馆门前服毒自杀殉约,以表义愤。冯夏威之死,将拒约运动推向高峰,但系热情总有点无以为计,所以写呢首粤讴嘅人,就借冯君之死,希望大家唔好辜负呢位义士生前愿望。

不过想你共表同情,唔用佢嘅美货。

咁嘅文明抵制,都算得极系平和。

今日杯葛例行,唔系叫做闯祸。

哎,须要想过,华民非只我。

试念吓嗰啲旅美同胞,受几许折磨。

嚟到最后,作者都变得「低声下气」,希望民众知道,参与运动嘅人只系想推动「文明抵制」,唔想一个咁简单嘅行动失败告终。而歌词提到「杯葛」,就系从英文boycott音译而成嘅中文字,喺当时开始大行其道,成为粤语嘅一部分。

而喺香港,当时皇仁书院嘅学生亦都曾经参与呢场爱国行动,可见中港两地总会以某种方式,联系彼此。

 


中国点点点星期一至五 下午三点至四点半

编导:张凤萍

监制:叶冠霖

【中国点点点】张凤萍、黄晓玲、王 磊、刘锐绍、郑汉良、吕秉权主持。每日话题由中国政情、至网络热话、旅游、生活、阅读,让听众轻轻松松,每天对祖国知多一点点。

常设环节

星期一:最紧要识法、领导点点菜

星期二:对谈中国

星期三:中国讨论区;同声同气谈天说地

星期四:点点评论;阅读中国

星期五:漫游中国;闲话粤语

专题分类:中国热话
发表评论

最新专题