【中国点点点──闲话粤语#34】团结民间靠贪官
2017-06-23

1905年,时值晚清嘅「拒约运动」,本质上系一场爱国民族主义抗争,号召中华儿女抵抗美国嘅不平等对待。但后来点解会逐步演变为打倒清廷嘅革命?今集《闲话粤语》,程美宝教授就同大家唱出呢段历史。



1906年,美国人出资承办粤汉铁路,广东、湖南、湖北三省嘅仕绅同民众,合力提倡收回铁路自办。当时广东省民众选出嚟自顺德嘅「大绅」黎国廉做代表,到武昌与时任湖广总督嘅张之洞谈判、会商。最终,铁路决定由三省自办,湖北为官办、湖南绅办,广东则为商办。

当时广东粮饷乾枯,缺乏经费,需要向民间及商家招手集资。有反对政府嘅民众认为,时任两广总督岑春煊意欲假借筑路,承机敛财,岑更强逼接收商办嘅粤汉铁路权,激起众怒。

黎国廉作为民众代表,佢负起责任驳斥岑春煊嘅做法,却被岑逮捕入狱。

呢一件就成为「粤路风潮」嘅导火线。因为黎国廉系「大绅」,亦即有功名嘅人,唔应该被随便逮捕。民众对官府嘅愤怒爆发,喺短时间内集资够三百多万元,入股粤汉铁路,刑成官民商争利格局。

程美宝教授就搵嚟以下呢首粤讴,讲述粤路风潮时期民众如何受官府刺激,而踊跃参与入股一事。

《真正踊跃》 作者:戆叟

真正踊跃,都系认股个中人。

黎绅受屈,只望我哋把气来伸。

 

认股若系延迟,人哋就话你凉血嗰部分。

你睇吓下流社会,尚且认得咁精神。

你话官府勒捐,谁个不愤?

就系花林贱品,亦表同心。

股够就商办得成,唔在肉紧。

 

唉!休痛恨。

若系有法筹钱,多认几份。

要知到此事系官民交讼呀,罢手唔能!

 

最后一句嘅「官民交讼」,就系当时民间将「粤路风潮」定性为官民互相对立嘅证据,因为官府喺呢件事上已经唔再企喺民间一方,令群众唔单只系对抗美国人,变成国家同社会嘅矛盾。

呢件事只系前奏,后来官府采取更强烈嘅打压,但同时激起民愤,究竟发生咩事?下回分解。

 


中国点点点星期一至五 下午三点至四点半

编导:张凤萍

监制:叶冠霖

【中国点点点】张凤萍、黄晓玲、王 磊、刘锐绍、郑汉良、吕秉权主持。每日话题由中国政情、至网络热话、旅游、生活、阅读,让听众轻轻松松,每天对祖国知多一点点。

常设环节

星期一:最紧要识法、领导点点菜

星期二:对谈中国

星期三:中国讨论区;同声同气谈天说地

星期四:点点评论;阅读中国

星期五:漫游中国;闲话粤语

专题分类:中国热话
发表评论

最新专题