【中国点点点──闲话粤语#42】儿时记忆三字经
2017-08-18

清末民初政治局势混乱,但同时系科技日新月异嘅年代,西方人一手硬,一手软,除咗军事上占据中国,佢哋嘅新发明同时大批流入民间。

上期《闲话粤语》,程美宝教授就开始介绍「名物三字书」,火水灯、火轮船呢啲火器,同宫座椅、贵妃床呢类旧物新旧「碰撞」,成为小朋友嘅中文堂新式课本。



重温一下程美宝上星期介绍嘅几句:

各物件,在眼前。
火水灯、火轮船、
鸡毛扫、鹅毛扇。
宫座椅,贵妃床。

新旧名物,点只咁少?接住落嚟仲有好多新发明排住队等你认识:

千里镜,百叶窗,山水画,茄楠香。

欲穷千里目,上一层楼当然需要,但配备一副「千里镜」,亦即系望远镜,似乎效果更佳。

自来火,自鸣钟,梳篦盒,水烟筒。

第一个词语「自来火」,程美宝教授解释,其实系火柴。而当时系时兴用「自」形容新发明,取其「自动生成」嘅特点。除咗自来火,仲有「自来水」,以及上句排第二嘅「自鸣钟」,亦即系闹钟。

梳篦盒以及水烟筒都属于当时嘅旧物,梳篦盒顾名思义就系放梳嘅盒。

磁器樽,玻璃盅,剃头刀,踏脚凳。

蚊帐鈎,睡铺绳,刨花碗,蒲草鞋。

当中比较特别嘅,系「刨花碗」,程教授指出,民国时期嘅人,会用榆树刨出嚟嘅木片,放到热水浸泡,最后制作成发胶,亦即今日所讲嘅定型剂。

从以上几句三字书,可以见到唔少妇女用嘅饰物,皆因呢本三字书就系出现在《妇嬬三四五字书》当中,目的就系为教育乡村嘅妇女、小童识字。

除咗物件,有另一款三字书可能勾起听众、读者们嘅共鸣,系列出儿时嘅记忆,以及喺屋企附近游玩嘅物件、设施:

我所住,住高楼。青草地,打千秋,放纸鹞,踢皮球。
打锣鼓,弹琵琶,带枝剑,骑匹马。学烧枪,试打靶。
唱只歌,摘朵花,捉白鸽,拍乌蝇,扯大缆,拉麻绳。打跟斗,舞哑铃。

玩完一大轮,当然唔可以玩物丧志,要乖乖返去读书:

入书馆,读筹书。开枝笔,写行字。
到夜晚,得闲时,睇报纸,读唐诗。

睇过呢啲三字书例子,你又钟意新式贴地版本,抑或由细听到大嘅讲道理版本呢?


中国点点点星期一至五 下午三点至四点半

编导:张凤萍

监制:叶冠霖

【中国点点点】张凤萍、黄晓玲、王 磊、刘锐绍、郑汉良、吕秉权主持。每日话题由中国政情、至网络热话、旅游、生活、阅读,让听众轻轻松松,每天对祖国知多一点点。

常设环节

星期一:最紧要识法、领导点点菜

星期二:对谈中国

星期三:中国讨论区;同声同气谈天说地

星期四:点点评论;阅读中国

星期五:漫游中国;闲话粤语

专题分类:中国热话
发表评论

最新专题