【逆境中反胜】

刚担任第12届世界运动会开幕礼持旗手的香港壁球运动员——刘子均，由 6 岁开始揸拍至今，已经23年。由一个成日喺校园乱跑嘅小朋友，到今日踏足世界舞台嘅专业运动员，佢话：「壁球系我嘅人生导师，教识咗我点面对失败、分享喜悦，仲帮我搵到人生方向。」

小学时因为太活泼，老师提议佢去试吓打壁球，点知一试就爱上。虽然头十年成绩唔算特别突出，只系香港分龄赛头八，但佢无放弃。反而因为读书未算理想，令佢更专心谂：「不如试下全职打壁球。」因为喺比赛击败咗港青成员，被体院邀请入队，正式踏上专业之路。

讲到最骄傲嘅一刻，刘子均提到自己第一次打入世界头 50：「嗰下先觉得自己真系踏实咗。」另一个深刻回忆，系第一次夺得香港冠军——喺决赛落后之下，最终反胜赢 3:2，嗰份感动，令全家人都热泪盈眶。最近佢仲成功攞到亚洲冠军，打破过往亚洲赛「八强止步」嘅魔咒，证明坚持真系会有回报。

专业运动员嘅日常，除咗重复性训练，仲要不断面对压力同失败。两年前，佢手腕严重受伤，仍然要硬住头皮为港队出战团体赛，九个月只靠「6-7成功力」上阵，痛苦到爆，但仍然顶到落去。佢话：「每一场波就似一份考试，无论胜负，都系运动员必经嘅课题。」

未来，刘子均希望喺新赛季突破世界排名头 30，更希望喺下届亚运男子个人赛企上颁奖台，弥补上届八强止步嘅遗憾。至于最终梦想，当然系奥运：「呢个系全世界壁球人等咗好耐嘅舞台，希望自己有机会踏足。」

「大家一定要相信自己，能力其实远超过想像。唔驶同人比较，只要唔放弃，努力行落去，总会达成你梦寐以求嘅目标。」

由校园跑到世界舞台，刘子均嘅壁球故事，写满咗坚持、拼搏同梦想。支持香港运动员，一齐见证佢哋嘅下一页。

相关文章：梁子轩：「壁球是我人生启蒙老师。」
相关文章：何家晞：「壁球是我自信，亦是我与家人情感的桥梁。」
相关文章：何子乐：「尽管曾经跌倒，但每次都能重新站起。」
相关文章：邓铭漮：「壁球代表我嘅人生。」
相关文章：黄祉谦：「壁球填满了我经历的每一页。」