【武术精神．勇闯世界】

今届世运会勇夺武术散打银牌——香港武术运动员 张溢霖，从小被李小龙、成龙、叶问嘅电影吸引，11岁开始接触散打，从模仿招式到专业培训，武术对佢嚟讲唔止系一项运动，更系一种「武德」——武止恶、扬善。佢话：「我从细好有憧憬去模仿武打类型嘅影片，能够透过散打去锻炼身心，好自然就决定踏上专业道路。」

2023年，美国第16届世界武术锦标赛，系佢印象最深刻嘅一战。比赛前压力巨大，比赛当时仲要调整时差，状态都唔系太好，但张溢霖靠住教练嘅鼓励同自己坚持：「最后过五关斩六将下进入四强，最后夺得第三名成绩，达成咗我俾自己嘅目标，所以我觉得那次比赛系我最印象深刻嘅时刻。」

作为专业运动员，张溢霖认为最难嘅唔系身体上嘅疲累，而系心理挑战。「攰嘅时候会想偷懒、请假，但我会用音乐或者励志影片调整自己，克服心魔先至可以完成训练。」佢坦言，正因为细个嘅偷懒经验，令佢明白心理坚持对成绩嘅重要性。

张溢霖下一个目标系2026年日本名古屋亚运会。过去错失两次机会，今次佢希望唔止参赛，更希望可以跻身前三。「我一直提醒自己，错过唔代表放弃，只要继续努力，梦想终会实现。」

张溢霖话：「做运动员唔容易，我坚持咗12年先攞到人生第一个世锦赛奖牌。年轻运动员唔好因为短期挫折而放弃，只要坚定目标，努力向前，一定可以攞到属于自己嘅成就。」

张溢霖嘅武术之路，充满汗水、挑战同坚持，每一步都系成长嘅痕迹。