【羽毛球梦．冲击世界】

香港本地羽毛球员吴英伦，由细到大，羽毛球一直都系佢生命中嘅一部分。因为屋企人钟意打波，佢好自然就接触咗羽毛球，慢慢发现呢项运动唔止系兴趣，而系佢最热血嘅舞台：「羽毛球比拼嘅唔止系速度同力量，仲有智慧、心理、技术同耐力，成件事都好正、好刺激。我好想挑战自己，冲击世界冠军呢个位置，证明自己一定做到。」

讲到印象最深刻嘅比赛，吴英伦第一时间就提到上年嘅香港公开赛打入八强同澳门公开赛夺得铜牌。「每一场比赛都系检视实力嘅机会，由青少年赛到成人赛，我每一年都有进步。上年嘅成绩唔单止肯定咗我嘅努力，仲畀咗我更大动力去向上冲击世界排名。」

专业运动员嘅路，从来都唔轻松。吴英伦直言，最艰难嘅系遇到樽颈位停滞不前：「你会觉得好沮丧，因为不停尝试又不停失败，有时仲练到发脾气，甚至唔想再打波。但我会不断提醒自己，相信自己做紧嘅嘢，继续坚持。因为我知道，只要唔放弃，距离突破同成功嘅『答案』就会越嚟越近。」

下一步，吴英伦希望可以成功入围世界锦标赛同亚运会个人项目资格。但佢最终嘅大梦想好清晰——奥运金牌！「打奥运、攞金牌返嚟，系我心入面最想实现嘅目标。」

对于满怀羽毛球梦嘅年轻球员，吴英伦勉励大家千祈唔好怀疑自己：「我哋中国香港运动员已经有同世界一较高下嘅实力，甚至有机会赢到对手。最紧要系相信自己，继续坚持落去。」

相关文章：伍家朗：「羽毛球唔单止系一项运动，更加系佢事业上最重要嘅伙伴。」

相关文章：陈浩源：「我要成为我理想中嘅人！」