【乘浪而上．逐梦海上】

由爱上海洋，到今届世界运动会男子尾波冲浪项目勇夺铜牌 —— 香港代表级 wakesurf 运动员 郑俊轩，一步一步，乘浪写下属于自己嘅传奇；就好似喺浪上翻滚嘅身影一样——自由、热血、充满勇气。

佢话自己「同大海一直好有缘」，由细到大就钟意出海同揸船。21岁嗰年，佢搵到一份揸滑水船嘅工，老板邀请佢试玩 wakesurf，结果「一试难忘」，即刻堕入呢项运动嘅世界。由一开始每星期落水练习，到后来全心投入训练，佢话：「嗰刻我好清楚，自己真正热爱嘅唔系书本，而系大海同挑战。」

2022年，佢第一次代表中国香港出外比赛，去新加坡参加亚洲巡回赛，结果赢咗冠军。「嗰次系我第一次以香港运动员身份出战海外比赛，成功企上颁奖台，对我嚟讲好难忘。」

令郑俊轩最值得骄傲嘅系，2025年成都世界运动会，尾波冲浪 Skim 板项目首次被纳入赛事，而郑俊轩亦首度披上港队战衣出战世运！面对世界级对手，佢顶住压力，以较高分数获得优胜，为香港夺得铜牌。

「嗰面铜牌唔止代表我个人成就，仲系香港 wakesurf 嘅里程碑。」

讲起训练挑战，佢坦言唔系日日都「浪漫」，「有时练高难度动作会撞墙，愈练愈唔啱feel。2024年世锦赛前，因为过度训练，导致状态混乱，愈练愈唔对路，一度陷入迷惘。」最后，佢靠调整心态、重新检视训练方向，慢慢搵返平衡：「运动员唔只要练身体，仲要学识管理好心理状态。」

未来，佢希望可以继续代表香港出战更多国际赛，令更多人知道——wakesurf 唔只系玩乐，而系一项认真、专业嘅竞技运动。同时，佢创立咗水上体能训练，希望令更多运动爱好者透过水上运动强身健体：「推动运动发展，都系我嘅人生目标之一。」

「唔好惊走一条唔同嘅路。只要你清楚自己想要乜，愿意付出努力，就一定会有机会成功。遇到难题唔好放弃，因为你嘅态度会决定你嘅高度。」

郑俊轩喺浪上起飞，用行动证明——热爱可以改变人生，坚持可以掀起属于自己嘅浪潮。