【武术人生．太极之道】
练武之路，从来唔易。日日重复同一套动作、面对无数次失败，学识「苦中作乐」，亦体会到坚持同沉着带嚟嘅力量。今届世运会勇夺香港武术太极拳太极剑全能项目金牌——香港武术运动员 杨颂熹：「武术唔只系一项运动，更加系佢人生嘅导师。」

「武术教识我点样控制心态，点样喺失败入面企翻起身。」细个嗰阵，爸爸成日睇李小龙，见到萤幕上啲动作又型又有气势，颂熹都会喺屋企跟住扮打。慢慢地，屋企人见佢真系有兴趣，就安排佢跟李珍珍师傅学武术，开展咗一条由热爱变成坚持嘅路。

问到印象最深刻嘅比赛：「每一个比赛对我都系最印象深刻。」由初出茅庐到代表香港出战，无一场比赛系白费功夫。正因为有一场又一场嘅经验，先令佢有能力挑战更高层次嘅舞台。「每一次比赛都造就紧而家嘅我，我对每一个我人生中嘅比赛都会话系最感恩。」

杨颂熹形容训练系「苦闷」，但佢反而学识咗点样享受。「武术无捷径，停三日唔练，就要用成个星期搵翻个感觉。既然开心唔开心都要练，倒不如享受吓嗰种嘅苦闷。」 正正系呢份苦中作乐嘅态度，令佢喺长年累月嘅基本功训练中，搵到属于自己嘅节奏同力量。

「我嘅梦想系可以代表香港出战亚运会！」。佢更希望能够令观众、评判同其他国家队嘅教练欣赏自己嘅太极演出：「只要佢哋认同我嘅表现，我就觉得好值得！」

「既然你哋拣咗武术，就唔好畀自己后悔。」杨颂熹话，呢条路一定唔会一帆风顺，但正正因为有困难，先可以磨练心态。「当你学识面对苦，将来无论做咩工、遇到咩大风浪，都唔会咁易崩溃。」佢仲鼓励后辈：「唔好怕丑，主动问多啲前辈同队友，咁你进步就一定更快！」

从童年模仿李小龙嘅小朋友，到今日以太极代表香港出赛，杨颂熹用实际行动诠释咗「武」字真正嘅意义。