对好多观众嚟讲，剑击优雅又潇洒，但对今届十五运会男子佩剑个人银牌得主何思朗嚟讲，剑击背后系战术同身体反应一齐爆发嘅运动，需要瞬间判断同身体反应完美配合，系一项斗志斗力嘅运动。他形容自己爱上剑击并唔系刻意选择，而系一种好自然嘅安排，一步一步练、一步一步打，最后就行咗上全职运动员嘅路，一直坚持到今日。

回望生涯最值得骄傲嘅时刻，世界锦标赛肯定系其中之一。嗰次一路过关斩将，面对嘅全部都系世界排名头16嘅顶尖对手。最震撼嘅一幕发生喺32强，佢当时落后14比9，基本上好多剑手都会放弃，但佢最终成功反胜！ 思朗坦言：「嗰种喜悦真系好难忘，感觉自己终于得咗啦，我系有能力系世界占一席位。」

讲到今届全运会，佢觉得呢面个人奖牌系对自己多年努力嘅肯定。第一场小组赛佢一度落后紧4比1：「全场观众嘅打气声，叫返醒我，最后反胜返5比4，之后先越打越有信心，好多谢各位现场嘅支持者。」

成为全职运动员从来唔容易。佢坦言过去两年系低潮期，成绩唔太理想，不断试新方法但屡试屡败，甚至怀疑自己。佢认为突破樽颈位系最难嘅一关，往往会觉得自己跌入无限轮回，但佢始终相信，只要坚持、总有一个方法适合自己。

讲到未来，何思朗嘅方向非常清晰——短期目标系亚运会，长期则以奥运为终极舞台。

对于新一代剑手，佢分享咗一句好深刻嘅话：「书几时都有得读，但做运动员错过咗就无。有梦就要追，但都要尊重屋企人，有孝先会顺。」佢话每个人都想做世界冠军，但关键系：「你有无本事做到？Why not me？」

何思朗嘅故事，系由兴趣变热爱，再由热爱变力量嘅旅程。专注一击，坚持一念，他用剑击走出属于自己嘅世界舞台。