罗浩天：「坚持自己钟意嘅嘢，先无悔无憾。」
对于香港剑击运动员 罗浩天嚟讲，剑击绝对唔只系一项运动。由小学畀同学拉住一齐上兴趣班开始，原本只系玩玩下，点知越玩越入迷。「剑击暂时占咗我人生大部份时间，亦都系最重要嗰部分。」呢份喜欢，陪住佢由细练到大，变成咗今日嘅热血、目标同信念。
（图片来源：受访者提供）罗浩天提到：「喺过去嘅比赛，试过打到个脑同个身体都好攰好攰、崩崩地，但我知有好多人喺度撑紧我，我唔可以就咁跌低。」就系呢份信念，支持住佢由谷底爬返上去，最后仲成功攞到胜利。对佢嚟讲，每一次突破自己，都系因为身边有人无条件支持。
剑击运动节奏快、专注度高，长年累月嘅训练讲求嘅唔止系体能，仲有心态。「最难都系个人好攰嘅时候，点样顶住，点样克服。」佢讲得直接：「一定会有起有跌，要学识接受，学识调节，唔好畀自己困喺低谷。」呢份抗压能力，系佢依家最珍贵嘅收获之一。
（图片来源：受访者提供）罗浩天：「短期目标系全运会，希望可以好好享受。」唔系话一定要赢，而系希望喺赛场上做到最好嘅自己，无悔发挥。我哋都睇到罗浩天全运会喺赛场上表现得非常精彩，每一分都打得好落力，无论顺境定逆境，都全情投入、毫不保留。
（图片来源：受访者提供）「好好坚持自己钟意嘅嘢，搵到自己嘅目标，相信自己，做好自己。」佢话，目标未必一定达到，但只要你努力过，就算最后结果点，都可以同自己讲一句：「起码我无悔无憾。」
