由一个单纯觉得「跆拳道好型」嘅女仔，到今日企喺世界跆拳道排名第三位嘅中国香港运动员，江丽莉一脚一脚踢出属于自己嘅位置。呢个排名，唔只系一个数字，而系无数次训练流汗、比赛受伤、取舍与坚持累积而成嘅结果。正如江丽莉所讲：「跆拳道，代表住我嘅生命。」对佢嚟讲，训练、比赛同工作，完全融入佢嘅生活当中。

回到最初，当年因为表弟学跆拳道，佢先第一次接触呢项运动。后来自己落场学，纯粹觉得「好型」，再加上想自己有一技傍身，遇到危险嘅时候可以保护自己。嗰阵时嘅动机好简单，亦冇谂过有一日会着上港队战衣，站上国际舞台。第一次比赛，只系抱住「志在参与」嘅心态，但一到真正上场，又自然唔想输。于是比赛前练多啲、再练多啲，当攞到奖项嗰一刻，成功感同满足感慢慢累积起嚟。

讲到最难忘嘅一场比赛，江丽莉毫不犹豫提起2024年印尼公开赛。嗰次身体状态极度不佳——天气酷热、水土不服、比赛前不停肚泻，加上旧患复发，个人情绪跌到谷底，甚至觉得自己一定攞唔到冠军。但佢形容自己性格偏乐天，负能量嚟得快、走得都快。冷静落嚟之后，佢反而同自己讲：「就算身体情况不佳，我都仍然有能力攞到呢个冠军。」呢份对自己嘅信任，成为佢撑落去嘅关键。结果喺出赛前食止痛药、顶住身体不适嘅情况下，成功夺冠。返到香港之后，足足休息咗一个星期先回复。

成为专业运动员，最难嘅唔一定系体能或技术，而系「放弃」嘅觉悟。江丽莉坦言，你要放弃玩乐时间、放弃充足休息、放弃冇节制嘅饮食，甚至放弃一部分收入，先可以真正推动自己追求更好成绩。

有一次，佢获选代表港队出外比赛，同一时间却收到一份高薪私人任教两星期邀请。金钱同比赛二拣一，佢最后选择咗披上港队战衣。幸好付出无白费，成功为港争光，亦令佢更加肯定自己嘅选择。

展望未来，江丽莉嘅目标好清晰——世界第一。佢知道呢条路好难，但以前觉得遥不可及嘅「梦想」，而家已经变成一个实实在在嘅「目标」。佢会继续努力，继续向前。

由一份纯粹嘅喜爱开始，到踢出属于自己嘅世界舞台，江丽莉一步一步踢出信念、踢出坚持。

相关文章：何甄陶：Make sure you are doing it for yourself.

相关文章：罗浩天：「坚持自己钟意嘅嘢，先无悔无憾。」

相关文章：何思朗：「有梦就要追！」