由一个觉得训练辛苦嘅男孩，到今日稳守世界跆拳道品势排名第五位嘅中国香港代表——陈颂贤。佢用时间同坚持，慢慢将抗拒变成热爱。呢个排名唔系一蹴而就，而系由无数次跌低、怀疑自己、再一次企起身嘅时刻堆叠而成。对陈颂贤嚟讲，跆拳道从来唔只系一项运动，而系佢做人做事嘅一种态度。

自从成为港队运动员之后，佢每日嘅生活都同「品势」扣连在一起。就算系休息日，佢都会反覆钻研每一个动作、每一个细节，思考点样可以再做好啲。呢份对细节嘅执着，正正反映佢待人处事嘅认真——因为只有认真对待，先可以真正做好每一件事。

不过，呢份投入并非一开始就存在。陈颂贤坦言，以前都曾经抗拒过跆拳道。日复日咁重复同一套动作，训练辛苦又沉闷，令佢一度怀疑自己可唔可以坚持。但随住训练慢慢成为生活一部分，佢慢慢沉醉喺挥洒汗水嘅过程中，加上对动作极致嘅追求，心态亦由「觉得沉闷」转变成「渴求进步」，慢慢学识享受每一次练习。

讲到最难忘嘅时刻，佢一定会提起2024年香港举行嘅世界跆拳道品势锦标赛。主场出战，好多亲戚朋友特登到场爲佢打气：「我记得我哋男子团体赢得铜牌嘅时候，好多观众都爲我哋欢呼，令我十分感触。」即使之后不敌美国队止步季军，但观众嘅掌声同支持，成为佢心入面最骄傲、最感动嘅画面。

喺品势训练入面，最难捱嘅从来都唔只系体能，而系意志力。日以继夜反覆打磨同一个动作，追求每一分到位嘅极致。陈颂贤：「体能训练上嘅艰辛、反覆练习同一个动作所需要嘅专注力、面对樽颈位停滞不前嘅烦恼，以至比赛落败时嘅挫败感，全部都要靠意志力支撑住自己，推动自己继续向前，坚持落去。」

展望未来，陈颂贤已经将目标放喺2026年亚洲锦标赛、世界锦标赛同亚洲运动会。赛期未定，但准备永远唔可以停。佢选择专注当下，每一课训练都唔松懈，希望到时可以攞到好成绩！

作为前辈兼现役运动员，佢寄语一班年轻运动员：「你哋经历紧嘅过程我都经历过，而我亦都无放弃过一直前进，希望你地都可以坚持落去唔好放弃，总有一日都可以取得好好嘅成就！」只要唔放弃、继续向前，总有一日，努力会带你去到属于自己嘅舞台。

汗水、挫败、坚持——陈颂贤一步一步踢出属于自己嘅位置。记住只要肯努力，梦想就唔会遥远！

相关文章：一脚一念．踢出信念｜江丽莉：由「型」开始，踢到世界第一

相关文章：何甄陶：Make sure you are doing it for yourself.

相关文章：罗浩天：「坚持自己钟意嘅嘢，先无悔无憾。」

相关文章：何思朗：「有梦就要追！」