由街场到启业活化：香港街篮精神与城市创意
喺香港嘅街头巷尾，篮球场永远系最有生命力嘅角落。唔单止系年轻人挥洒汗水嘅地方，更承载住友情、成长同社区回忆。
叶嘉华（Jason Yip），一位由街场走入传媒、再投身运动场设计及体育管理嘅传奇人物，生于80年代，亲身见证香港街篮文化由热潮到活化嘅转变。佢嘅故事唔止系个人奋斗历程，更系香港街头篮球文化嘅缩影，当中充满坚持、创新，同对社区嘅深厚热爱。
街场与生活（图片来源：受访者提供）街场与生活
问：对你嚟讲，街场除咗打波之外，仲承载住啲咩生活回忆？
答：
对我嚟讲，街场从来唔只系打篮球嘅地方。生于80年代，成长时期资讯未算发达，社区内嘅公共空间就系我嘅社交平台，而因为钟意篮球，街场自然成为我最常流连嘅地方。 受到90年代NBA热潮影响，当年有唔少年青人打篮球，而我人生最好嘅朋友，亦正正喺街场认识。最初大家系「敌人」，打波时互有输赢，慢慢喺切磋之中建立默契，由对手变成朋友，直到今日依然无分彼此，好似一家人。
街篮的「跟队制度」（图片来源：受访者提供）问：街篮嘅「跟队制度」对你嚟讲有咩影响？你觉得佢塑造咗你啲咩性格同特质？
答：
街场嘅「跟队制度」对我影响深远。成长于公共屋村，面对嘅问题就系两、三个篮球场有时候不足以应付所有居民嘅使用量。要知道八、九十年代无智能电话、无网络世界，电视游戏机都属于奢侈品，好多时候打波就系主要娱乐，一输波随时要等好耐先有得再落场。 正正因为咁，我由细就养成一种唔服输嘅态度，不断反覆练习、提升自己——唔系唔输得，而系唔可以输。呢种心态一路影响住我嘅成长，亦带到而家嘅体育管理工作入面，凡事尽力处理，不畏惧、不退缩。
职业生涯启发（图片来源：受访者提供）职业生涯启发
问：你由街场打波开始，之后做体育媒体，又参与运动场设计同体育管理，回望返，你觉得街篮对你事业最大嘅影响系咩？
答：
我一直都唔介意分享自己嘅故事，希望可以启发更多人。初中时爸爸因病过身，家姐亦到外国读书，为咗减轻屋企负担，我开始搵兼职。由于一向好钟意NBA，我写信自荐到当时全港唯一嘅NBA杂志应征，经过考核后成功获聘，正式展开我嘅传媒人之路。 回顾返，其实呢段经历相当特别。求学时期其他同学多数做补习、售货或餐饮工作，而我就写文章、分析赛事、访问NBA球星。当初能够把握到机会，正正源于不畏惧、不退缩嘅态度，而呢份心态，其实早已喺街场打波时不知不觉培养出嚟。 随住纸媒式微，我转型继续喺网络媒体发展，透过篮球走访不同地方，亦认识到世界各地嘅朋友。大约喺2013年，我开始建立自己嘅平台，记录不同地方嘅街场文化，当中亦包括香港。 由介绍街场同社区开始，慢慢衍生出唔同项目，亦令更多人重新留意自己身边嘅人同事。其后诞生咗《捍卫主场》同《启业运动场》等大家熟悉攞咗国际性奖项嘅项目。直到而家，我依然为自己能够参与、甚至推动香港运动产业发展而感到荣幸同骄傲。
启业运动场活化计划（图片来源：受访者提供）启业运动场活化计划
问：启业运动场活化计划嘅设计灵感系嚟自边度？你最想保留或者特别强调啲咩元素？
答：
作为香港首个注入设计元素嘅运动场，我同拍档喺创新之余，刻意保留启业运动场原有特色，例如黄色外框同天窗，让新旧融合，呈现香港精神。 设计灵感来自我哋走访世界各地街场嘅经验，透过不同高度嘅篮球框同具象征性嘅装置，表达运动场可以由市民自由定义，成为适合一家大细、属于所有人嘅共融空间，同时亦系社区嘅聚脚点。
新启业运动场感受或体验（图片来源：受访者提供）问：你希望新启业运动场想带畀用家一个点样嘅打波体验？
答：
我希望所有使用者都玩得开心，美观、实用同灵魂缺一不可。运动场启用至今反应热烈，无论打波定打卡，使用者都感受到我哋嘅用心。 启业运动场嘅经验，令更多人开始关注运动场设计。不过我始终相信，设计唔应该过于花巧，亦希望未来不同单位喺规划场地时，可以多从用家角度出发，喺设计同实用之间取得平衡，令场地更方便、更贴近市民需要。
街篮文化与城市体育议题
问：你觉得香港嘅街篮文化，同我哋嘅城市生活方式有啲咩关联？
答：
香港街头篮球文化同城市生活方式息息相关，地小人多，球场数量有限，唔少街场尺寸比例唔够理想，例如三分线同边线距离不足。 如果空间有限，其实可以考虑唔划线或简化设计，因为街场主要系休闲用途。其他地方如中国、美国、日本，好多街场都冇三分线，甚至只有边线，简洁、美观同实用兼备。 另外，香港街场节奏较快，多数系速战速决，亦反映咗城市生活嘅快节奏。
问：如果有机会重新规划香港嘅公共运动场，你最想改变啲咩，或者有边啲特色一定要保留？
答：
自从启业运动场出现之后，特色运动场越来越多。我希望未来翻新或活化运动场时，可以注重新旧融合，融入香港特色元素。香港本身好特别，唔需要拆晒所有嘢先系好，保育、善用空间同增添艺术感都好重要。
街头篮球精神（图片来源：受访者提供）
