由最初因为阅读日本运动漫画《排球少年》而对排球产生兴趣，到今日成为香港排球代表队嘅主力之一，江卓轩用咗好多年时间，打出属于自己嘅位置。呢个位置，唔只系球场上嘅角色定位，而系无数次训练流汗、比赛拼搏、取舍同坚持慢慢累积而成嘅成果。正如佢所讲：「排球对我嚟讲系一项可以释放自己嘅运动，每次挑战高水平嘅对手都觉得好热血、好满足。」对江卓轩嚟讲，排球早已唔只系一项运动，而系推动佢不断向前、突破自我嘅一部分。

讲到过往比赛当中印象最深刻嘅一刻，虽然有好多大型比赛如亚运会同全运会都令佢难忘，但如果要拣一场，佢会讲2024年香港甲一联赛四强。嗰年系佢第一年打甲一联赛，球队由降班危机到杀入四强，个过程已经好满足。当日对手状态火热，佢哋作为新秀去挑战，拉锯咗五局惜败，而佢自己交出咗31分嘅个人得分。即使输，但系佢哋嘅表现绝对值得骄傲。呢场波唔只系比赛，更系同班兄弟一齐拼搏嘅回忆。

今次参加全运会，对江卓轩个人同运动生涯嚟讲，代表住一个好珍贵嘅锻炼机会。因为对手基本上都系职业队，训练时数、配套同资源都远超港队。所以每场比赛都系硬仗，但佢哋凭住斗志同技术，不断挑战对手，甚至最后赢咗3队职业队，创造咗香港队嘅历史佳绩。呢个结果证明咗香港队嘅水平，证明咗即使资源有限，都系有好多可能性。提醒住佢要不断进步不断向前行。全运会男排项目虽然唔系香港举办，但现场出乎意料地有好多支持香港队嘅球迷，不断为佢哋打气。感受到佢哋对排球同香港队嘅支持，令佢觉得原来都有好多人期待住佢哋嘅表现，都系一种动力去发挥得更好。

成为运动员，一路都唔容易。喺排球训练入面，卓轩觉得最艰难嘅挑战系时间分配。佢自己本身读紧书，备赛期一个礼拜7日都要练波，仲有4日肌力与体能训练（S&C），再要翻学嘅时候，真系唔够用。要喺咁密集嘅行程底下确保充足休息，好艰难。一年前，佢就因为无好好分配时间，休息唔够，好不幸咁受伤要休息半年。之后佢就好重视点样去平衡训练同作息，确保自己每日都可以用最好嘅状态去应付所有挑战。

谈到未来目标，江卓轩毫不犹豫咁讲：「我暂时嘅目标就系大专联赛同甲一联赛嘅冠军，因为呢两个比赛，我都未赢过。」讲到呢度，佢语气变得更加坚定，直言：「而我都唔再系以前嘅细路，我好想用自己努力锻炼返嚟嘅实力，帮助球队征服呢两个比赛。」江卓轩亦为自己定下要求，希望喺进攻同防守两方面都交出对得住自己、亦对得住队友嘅表现，同球队一齐，写下属于佢哋嘅新一页。

对于追梦嘅新一代年轻球员，江卓轩想同佢哋讲：喺香港打排球想登顶唔容易，但唔系无可能。只要有斗志有斗心，再多嘅困难都唔会阻到你。就系要困难，先有要完成嘅意义。不甘平凡，唔好接受自己嘅平庸，努力去挑战自己，你嘅极限永远比你想像中更加远。

由一份纯粹嘅喜爱开始，到扣出属于自己嘅全运会佳绩，江卓轩一步一步扣出信念、扣出坚持。

相关文章：体育学堂 排球101：认识比赛规则与场地