对香港剑击代表队嘅运动员梁千雨嚟讲，剑击从来唔只系斗快斗狠咁简单，而系一项结合力量、速度，同埋满满mind game嘅运动。由细个开始，佢已经好钟意玩剑击。除咗享受赢嗰份痛快，佢更加珍惜同强劲对手交锋嘅机会。就算输咗，佢都会将每场失利转化成学习机会，透过分析同改进，持续提升自己嘅实力。对佢嚟讲，输从来唔系终点，而系升级嘅起点。正正因为呢份对进步嘅渴望，令佢由细到大都好清楚，自己想全心投入剑击，行到更远。

讲到最难忘嘅一刻，梁千雨即刻谂起2024国际剑击联会花剑世界杯 - 中国香港站攞到团体冠军嗰日。嗰日每一场波都打得超好，对住嚟自世界各地嘅高手，我哋香港队竟然可以逐个击破，打完之后自己都觉得好难以置信：「我相信呢个系一个我值得自豪嘅时刻！」

今次全运会，对梁千雨嚟讲系人生第一次参加大型综合运动会盛事，而且仲系喺香港主场举行！虽然个人赛表现有啲失准，但团体赛成功攞到金牌，已经系一个好完美嘅开始。佢话：「希望之后再有机会参加运动会，都可以有更好嘅表现同成绩。」最打动佢嘅，系全运会嗰种气氛，大家好支持港队，好落力咁为我哋打气，令佢由衷感动。

做职业运动员，最艰难嘅挑战唔系训练几辛苦，而系要保持一个健康嘅身体。梁千雨好坦白讲到：「相比起练到好攰，病或者受伤嘅感觉更加难受。」因为一受伤，就无得全心投入训练，又要担心练得多会唔会令伤势恶化。所以佢一直都学紧点样保护自己，佢最常挂喺口边嘅一句就系：「人无事，先可以做到世界冠军。」呢句说话，听落简单，但系好多运动员都深有体会。

讲到未来目标，梁千雨眼神变得更加坚定：「我希望喺世界赛可以攞到个人奖牌。」虽然最近几场比赛表现唔系太理想，但佢视之为宝贵学习同经验：「只要继续努力、继续调整，我相信我可以突破自己，发挥到更好嘅水平。」

最后，梁千雨想同所有追梦嘅年轻人讲：「请记得尽情享受追梦嘅过程，搏尽无悔。」由一份纯粹嘅喜爱开始，到打并出属于自己嘅全运会金牌，梁千雨一步一步「剑」出信念、「剑」出坚持。

相关文章：罗浩天：「坚持自己钟意嘅嘢，先无悔无憾。」

相关文章：【何思朗：「有梦就要追！」

相关文章：香港剑击四大名将：张家朗、江旻憓、何玮桁、陈诺思

相关文章：体育学堂 ：剑击101 (上)

相关文章：【体育学堂 ：剑击101 (下)