对香港田径代表队嘅跳高运动员钟慧欣嚟讲，跳高从来唔只系跳得高咁简单，而系一项需要不停跨越心理关口嘅运动。比赛入面永远都系以失败嘅最后一杆作结，但正正如此先会不停令人想追逐下一次更高嘅高度。最初接触田径，只系小学时偶然被选中入校队；升中之后因为身高优势，先正式开始跳高。虽然已经跳咗足足十五年，但生涯前半段成绩一直平平无奇，从来无谂过自己有机会成为全职运动员。大学毕业前，佢决定最后搏一次，唔甘心未发挥到full potential就放弃。佢试过唔同训练方法，最后终于等到全职机会，一步一步走向专业竞技道路。

讲到生涯入面最难忘嘅一刻，钟慧欣即刻谂起上年十二月喺法国一个赛事突破个人最佳嗰一跳！距离上一次个人最佳已经两年半，期间有过好多气馁到想放弃嘅低谷。呢场小比赛无乜观众，佢都习惯带住失望心情离开。但系每跳过一个高度，佢突然再次意识到：「无论喺边度跳、规模有几细，我都想做到最好。我只系想喺跳高呢条路上向前行继续进步。」

今次参加全运会，对钟慧欣个人同埋整个跳高生涯嚟讲，意义重大。虽然2023年开始已经不断出战亚洲赛事，但全运会系佢第一次参与。最深刻嘅唔系场地或者观众，而系运动员嘅心态。佢同国内一众顶尖选手倾偈之后，先发现自己比赛心态未够成熟。国内每个月都有好多比赛，大家水平高、竞争大，但每个人都抱住「接受已经发生嘅事，只展望将来点进步」嘅态度。呢种坦然同前瞻，系佢觉得最值得学习嘅一课。

跳高要速度、力量同技术完美配合，训练过程入面最艰难嘅挑战就系技术调整。弯道助跑、踏跳、过杆，每一个细节都互相影响。单单改埋助跑起点，就已经可以差好远。佢话最复杂就系要搵到最适合自己嘅一套配搭，仲要纠正过去十几年累积落嚟嘅坏习惯，有时感觉就好似要你重新学行路咁辛苦。

展望未来，钟慧欣短期目标系喺2026年亚洲比赛攞到奖牌，好好喺大型舞台证明自己实力；长期嘅目标希望自己追逐到1.9米，登上世界舞台！

由小学偶然起步，到今日全职跳出属于自己嘅高度同信念，钟慧欣一步一跳「跳」出坚持、「跳」出无悔。

相关文章：一剑一念．心战无悔｜梁千雨：请记得尽情享受追梦嘅过程，搏尽无悔。

相关文章：一球一念．挑战高墙｜江卓轩：由「型」开始，打出全运会历史佳绩。

相关文章：坚持搏尽．踢出高峰｜卢蔚丰：跆拳道教我自信乐观，改变咗我嘅人生

相关文章：由街场到启业活化：香港街篮精神与城市创意