对香港田径代表队跳远运动员陈铭泰嚟讲，跳远唔只系冲刺再起跳咁简单，而系一项要同自己不断较量嘅运动。由助跑速度、踏板时机，到空中姿势同落沙，每一跳都系速度、力量同技术嘅完美配合，但同时亦系心理嘅挑战。

其实佢接触田径嘅经历，同好多香港小学生一样，都系由小学陆运会开始。因为比赛有成绩，自然对田径产生兴趣，再加上遇到一位好教练，每一年都见到自己有进步，慢慢就爱上咗跳远。嗰种每次突破自己嘅满足感，令佢愈跳愈投入。真正嘅转捩点，出现喺中六学界赛。嗰一年佢第一次打破香港纪录，突然意识到自己原来有能力代表港队出战亚洲赛甚至世界赛。完成DSE之后，佢喺大学一年级正式加入体院，踏上每星期训练六日嘅全职运动员之路，亦开始向「8米」目标进发。

讲到生涯入面最难忘嘅一刻，佢提到2023年亚洲田径锦标赛跳远决赛。相隔六年，再一次喺大赛入面两次跳过8米。对佢嚟讲，呢两跳唔只系成绩，更加系多年努力嘅证明。由训练、低潮到重新站起嚟，每一步都有人陪伴同支持，所以呢个时刻亦系佢想感谢身边所有人嘅一刻。

唔经唔觉，陈铭泰已经参加到第四次全运会。由当年队入面嘅后辈，到而家成为队中嘅「老大哥」，时间悄悄咁过去。令佢最深刻嘅，其实未必系比赛本身，而系身边嘅人。无论系香港队队友，定系来自其他地方嘅跳远对手朋友，大家都陪伴住彼此经历运动员生涯，但亦有唔少人逐渐退下嚟。当佢回头望，发现自己依然仲喺跑道上坚持紧，呢份感觉反而更加深刻。

如果讲到训练入面最大嘅挑战，佢坦言其实唔系技术，而系心理调整。因为比赛时嘅压力同节奏，永远无可能100%喺练习入面模拟得到，只可以尽量做好准备。佢人生最戏剧性嘅一场比赛，就发生喺欧洲。星期六晚喺法国完成一场成绩唔理想嘅比赛，但12小时之后仲要赶去另一场赛事。期间仲要经历6小时交通，由法国转2次车去瑞士，休息严重不足，前一日仲触及脚踭伤患。原本完全无期望，但偏偏喺最后一跳，佢跳出5年以来第一次8米成绩。呢次经历令佢深深体会到：运动成绩有时未必需要最完美嘅准备，反而系当心态调整好，往往会出现意想不到嘅突破。

展望未来，佢而家最重要嘅目标就系2026年日本名古屋举行嘅亚运会。呢亦系佢同教练Animo重新合作之后嘅首个大目标。佢希望可以再次突破自己保持嘅香港纪录，用全新技术去证明自己仍然可以再进一步。

最后，陈铭泰想同一班追梦嘅年轻跳远运动员讲一句说话：「人生无如果，每一次机会都要把握好，尽力去做，唔好畀自己后悔。」运动员生涯一定会经历高高低低，而佢能够一路坚持到今日，除咗身边人嘅支持，更重要系清楚自己嘅目标，同埋对自己保持信心。因为有时，心态就系决定命运嘅关键。

由小学陆运会起步，到一次次飞越沙池刷新自己纪录，陈铭泰一步一跳，跳出属于自己嘅距离，同埋永不放弃嘅信念。

相关文章：跳过高度．跨越无悔｜钟慧欣：跳高比赛以失败嘅最后一杆作结，却令人想再跳一次。

相关文章：一剑一念．心战无悔｜梁千雨：请记得尽情享受追梦嘅过程，搏尽无悔。

相关文章：一球一念．挑战高墙｜江卓轩：由「型」开始，打出全运会历史佳绩。

相关文章：坚持搏尽．踢出高峰｜卢蔚丰：跆拳道教我自信乐观，改变咗我嘅人生

相关文章：由街场到启业活化：香港街篮精神与城市创意