由一个单纯钟意打波嘅年轻人，到今日喺球场上拼搏嘅排球运动员——谭竣颢，用心打出属于自己嘅成长轨迹。对佢嚟讲，排球从来唔只系比赛，而系融入生活，甚至成为生命中不可或缺嘅一部分，亦系支撑佢走过高低起伏嘅精神寄托。「排球对我嚟讲，唔单止系一项运动，更加系我嘅生活、生命同精神寄托。」真正令佢爱上排球嘅，唔系单纯嘅胜利时刻，而系每一次面对挫折、受伤，甚至想放弃嘅时候，学识点样调整心态、重新出发。呢种由低谷一步一步爬上嚟嘅成功感，先至系最难得。

排球系一项六人团队运动，无需同对方有任何肢体碰撞，但极度讲求默契同信任。「唔可以靠一个人赢波」，每一分都系全队努力嘅成果。正因为咁，排球对竣颢嚟讲，已经唔再只系单纯嘅运动，而系教识佢成长、团结同坚持嘅人生导师。

讲到最难忘嘅一场比赛，佢提到2025年全运会对战天津队。面对职业球队，虽然赛前准备充足，但佢开局表现未如理想，一度被换离场，心态亦受到影响。不过佢离开场之后重新调整心态，最终喺后段重新上场发挥，帮助球队以3:2反胜对手。「呢场波真系靠心理质素同全队人一齐努力，先可以换来一场咁艰辛嘅胜仗。」加上现场有大量香港观众支持，可以喺主场馆获得一场胜利，系非常之难得。

2025年全运会对佢嚟讲意义重大，可能系一生人唯一一次参与。虽然佢坦言自己整体表现未算理想，但喺队友支持同教练信任之下，一路调整状态，喺最后一场总算交出一个比较满意嘅表现。经历九场高强度比赛，香港队最终取得四胜五负、全国第十名。面对有完善职业配套嘅强队，作为业余队伍能够交出呢个成绩，对佢哋嚟讲绝对系肯定同里程碑。

不过光鲜背后，其实系全年无休嘅付出。由本地联赛到排总杯，再到代表队赛事，香港排球几乎无休赛期。最困难嘅唔只系体能，而系点样长时间维持高水平状态。「状态一定有高低，点样调整心态先最关键。」再加上佢已经投身职场，平日要返工，周末打联赛，同时每星期仲要进行三至四日体能训练，时间同体力都被压榨到极致，甚至连休息时间都要牺牲，全靠对排球嘅热诚同爱支撑。

展望未来，竣颢目标清晰。短期希望喺香港甲一组排球联赛2026夺得冠军，努力多年后仍希望拎到嘅殊荣；长远则希望有机会冲出香港，挑战海外职业联赛。「尽管呢件事好难完成，而且要牺牲嘅都好大，但都希望可以喺自己仲有力气同青春嘅时候闯一闯。」

最后，佢送上一句说话俾所有追梦嘅年轻人：「You will never know your limits until you push yourself to it.」唔好等见到结果先努力，而系一直坚持，先会见到成果。由低谷到反弹，由迷失到坚定——谭竣颢用行动证明，真正嘅强大，系喺逆境之中，依然选择继续向前。记住球一日未落地，一切未完！

相关文章：飞越沙池．突破纪录｜陈铭泰：有时最重要唔系完美准备，而系正确心态。

相关文章：跳过高度．跨越无悔｜钟慧欣：跳高比赛以失败嘅最后一杆作结，却令人想再跳一次。

相关文章：一剑一念．心战无悔｜梁千雨：请记得尽情享受追梦嘅过程，搏尽无悔。

相关文章：一球一念．挑战高墙｜江卓轩：由「型」开始，打出全运会历史佳绩。

相关文章：坚持搏尽．踢出高峰｜卢蔚丰：跆拳道教我自信乐观，改变咗我嘅人生

相关文章：由街场到启业活化：香港街篮精神与城市创意