「我嘅正职系打手球，兼职系做教练。」对香港手球代表陈梓朗嚟讲，呢句说话唔系讲笑，而系一种身份认同。手球对佢而言，从来唔只系兴趣同专业咁简单，如同武士道、柔道等，手球相等于梓朗嘅「道」，需要长时间修行、磨练意志同信念，亦已成为佢生活嘅核心。

最初接触手球，其实系一次误打误撞。小六嗰年，学校篮球队赢咗区内冠军，老师顺便报埋学界手球比赛，练咗唔够两星期就落场。因为佢唔惊波，被安排打龙门，连球例都未熟就出赛，竟然一路闯入八强。升中后，教练叫佢转打辅位同翼位，由守转攻，第一次感受到全力起跳射门嘅快感——嗰种喺半空爆发力量、将球狠狠轰入龙门嘅瞬间，令佢真正爱上手球。到高中，佢决定将手球定为主项。后来代表港队出战国际赛事，见识亚洲顶级水平，发现自己与职业球坛之间嘅距离其实并非遥不可及，于是立志以成为职业球员为目标，一直努力至今。

讲到最深刻嘅时刻，佢一定拣今届全运会。以往港队出战大型赛事多数作客海外，从未试过有主场观众支持。今次喺香港迎战职业劲旅，置身激烈竞争之中作战。对手一星期练五日、一日两课，无论训练量、资源配套，抑或球员身型都远胜港队。但佢哋无退缩，用自己嘅方法迎战强敌，历史性打入四强，向所有香港人证明香港手球有能力挑战职业水平。

四强对安徽队一战，展现出佢顶级水准的其中一场比赛。球队部署先派力量型主攻连润滔消耗对手，等对方适应节奏后，再由速度型嘅佢上场改变战况。佢喺场边细心观察对手习惯及分析球场情况，一落场即刻针对弱点，帮球队追回比数，防守上亦成功制造失误同抄截。虽然最后惜败无缘决赛，但佢直言呢场系自己发挥得最好嘅一场，而佢亦系整个赛事抄截数最多嘅球员。

被看见的光芒之中，夹杂着资源匮乏的现实。十九岁第一次入选成年队时，港队甚至无恒常训练，一个月未必借到一次室内场，更无健身室同物理治疗支援。即使后来资源有所改善，仍然难以与职业球队相比。无职业配套，佢就自己创造条件——自费聘请肌力与体能训练（S&C）教练，安排科学化体能训练。亦喺坊间寻找配备力量平台（Force plate）、速度感应器（VBT Sensor）、飞轮（Flywheel Equipment）等高价训练器材嘅健身室，只为喺体能上贴近职业水平；训练以外，兼任教练维持收入，同时确保唔影响备战，用自己方法喺香港做到接近职业嘅要求。

展望未来，团队目标系今年九月名古屋亚运会冲击前八，年尾中国超级联赛香港分站再挑战头三名，希望喺主场再创历史佳绩。至于个人目标，始终如一以旅外成为职业球员为目标，争取于外地职业球队落班嘅机会，成为香港第一个挑战外国职业联赛嘅手球运动员。

对年轻一代，佢只想讲一句：「千祈唔好怕输，把握机会继续变强。」因为每一次跌倒，都系变强嘅开始。由小六误打误撞入八强，到今日为港队披甲上阵；由无场练波，到自费追贴职业水平。陈梓朗用行动证明，手球唔只系一项运动，而系一条用双手慢慢筑起嘅未来之路

相关文章：飞越沙池．突破纪录｜陈铭泰：有时最重要唔系完美准备，而系正确心态。

相关文章：跳过高度．跨越无悔｜钟慧欣：跳高比赛以失败嘅最后一杆作结，却令人想再跳一次。

相关文章：一剑一念．心战无悔｜梁千雨：请记得尽情享受追梦嘅过程，搏尽无悔。

相关文章：一球一念．挑战高墙｜江卓轩：由「型」开始，打出全运会历史佳绩。

相关文章：坚持搏尽．踢出高峰｜卢蔚丰：跆拳道教我自信乐观，改变咗我嘅人生

相关文章：由街场到启业活化：香港街篮精神与城市创意