对空手道运动员邓宇轩嚟讲，空手道从来都唔只系一项运动，更系一场长期嘅自我修练。由细到大，每一个阶段佢都面对唔同课题，而空手道教识佢嘅，唔止系技术，仲有点样面对挑战、调整心态，一步一步成为而家嘅自己。

佢同空手道嘅缘分，唔单止喺训练场上，更延伸到家庭之中。由细个开始，一家人一齐喺屋苑练拳、研究技术，到一齐出队比赛，空手道成为咗佢同屋企人之间最深厚嘅连结。呢种一齐经历、一齐成长嘅过程，正正令佢真正爱上呢项运动，并决定走上专业道路。

讲到运动生涯入面最难忘嘅时刻，邓宇轩坦言有好多「第一次」——第一次登上世界排名第一、第一次赢得世界搏击运动会金牌、第一次夺得全青运冠军。每一个成就都得来不易，但如果要拣一个最难忘同最骄傲嘅时刻，佢会毫不犹豫拣第一次攞亚青冠军。比赛结束后，佢睇返屋企人喺屋企睇直播嘅片段，见到佢哋激动到喊，甚至第一次见到爸爸流泪，再亲耳听到爸爸妈妈一句「We’re so proud of you」。嗰一刻，对佢嚟讲唔单止系胜利，更系作为儿子最值得骄傲嘅时刻。

不过，成为运动员从来都唔容易。邓宇轩直言，训练中最大嘅挑战一定系伤患。细个时候好少受伤，但踏入U21组别开始，要同时应付青年同成人组别赛事，强度倍增，身体负荷亦愈来愈大。喺2023年亚运，更曾经历一次严重伤患，直到而家都未完全康复。但正正因为呢段经历，令佢更加了解自己身体嘅极限，学识点样同伤患共存，同时调整步伐继续向前。

展望未来，佢今年最大嘅目标系希望可以喺亚运舞台上踏上颁奖台。不过，比起成绩，佢更重视嘅系好好享受每一场比赛。因为佢相信，只有真正享受每一次出场，先可以发挥出最真实、最强嘅自己。

最后，邓宇轩亦想同一班怀住空手道梦想嘅年轻人讲一句说话：「唔好为自己设限，呢个世界已经有太多枷锁。如果你有梦，就放胆去试，唔好理人点睇，亦唔好谂会唔会成功，因为唔试就永远唔会成功。」人生最可惜嘅，从来都唔系失败，而系留下「What if」嘅遗憾。

由一拳一脚开始，邓宇轩唔单止打出成绩，更一步一步，修练出属于自己嘅人生。

相关文章：飞越沙池．突破纪录｜陈铭泰：有时最重要唔系完美准备，而系正确心态。

相关文章：跳过高度．跨越无悔｜钟慧欣：跳高比赛以失败嘅最后一杆作结，却令人想再跳一次。

相关文章：一剑一念．心战无悔｜梁千雨：请记得尽情享受追梦嘅过程，搏尽无悔。

相关文章：一球一念．挑战高墙｜江卓轩：由「型」开始，打出全运会历史佳绩。

相关文章：坚持搏尽．踢出高峰｜卢蔚丰：跆拳道教我自信乐观，改变咗我嘅人生

相关文章：由街场到启业活化：香港街篮精神与城市创意