对港队乒乓球运动员吴咏琳嚟讲，「乒乓球」从来唔只系对手之间嘅较量嘅运动，而系一面镜，令佢不断了解自己、探索自己。「其实我系因为哥哥打波，我喺隔离执波先接触到乒乓球。」由最初只系陪伴，到后来越打越好，佢嘅路其实一步步走得好自然。细个已经活跃于唔同运动，游泳、田径、榄球、跳绳、花式溜冰样样都有涉猎，但偏偏系乒乓球成绩一路突围，由青苗、少儿精英队，到入选香港青少年队，慢慢将重心放喺呢项运动上，亦正式踏上竞技之路。

讲到最难忘嘅时刻，佢提到2024年混合团体世界杯。当时佢同混双拍档之前表现未算理想，但喺关键赛事临危受命，压力爆灯。「真系好紧张，但无谂过我哋可以喺压力之下打出超水平发挥。」最终成功为团队取得优势，加上队友们嘅努力，港队历史性夺得铜牌。对佢嚟讲，最深刻唔单止系成绩，而系全队嘅气氛，每一分都有人全力呐喊、打气，有队友甚至叫到失声。「嗰种团魂，真系会令人觉得我哋可以创造奇迹。」热血程度，至今仍然历历在目。

而2025年世大运，对佢嚟讲更加系一个突破。女团同女单双双夺铜，尤其系女单奖牌，系历史性一刻。「2023年其实我都有攞过女团铜牌，但当时无喺关键时刻上场。但今次系以一号主力身份帮团队攞分，感觉完全唔同。」由旁观到主力，由参与到承担，呢份成长令佢特别自豪，而女单奖牌更令佢至今仍觉得有啲不可思议。

不过，风光背后，从来都唔系一条易行嘅路。对吴咏琳嚟讲，最大挑战唔系技术，而系心态。「最难系调整心态：努力后成绩未如理想，就要冷静反思、继续专注训练解决问题，而唔系继续沉寂系一次失利当中。」佢回忆2024年WTT新加坡大满贯，女单落败之后好崩溃，甚至打电话畀屋企人话想退役。「嗰次系我人生喊得最耐、最痛苦嘅一次。」但正正系呢个低谷，令佢重新审视自己。多得师姐同教练嘅开解，加上家人一直以来嘅支持同无对佢施加压力，佢最终重新振作，并喺同年尾迎来突破性成绩。跌过，先学识点样再起身。

展望未来，佢对自己有好清晰嘅方向。短期希望可以调整好心态，更加相信自己，以更积极嘅状态面对每一日训练，同时喺世锦赛同亚运会冲击八强，力争奖牌。长远目标，就系2028年奥运争取参赛资格之余，目标直指八强甚至更高位置。为港争光，对佢嚟讲唔只系口号，而系一步一步用实力去实现嘅承诺。

最后，佢亦送上一句说话俾所有追梦中嘅年轻运动员：「老天爷唔会畀你一个你战胜唔到嘅困难。」佢坦言，追梦一定会遇到比想像中更多嘅挫折，但正正系每一次跌低、每一次突破，先会构成真正嘅成长。「当你回头望返，你会觉得一切努力嘅汗水同不甘心嘅泪水，都系值得嘅。」只要继续相信自己，努力搵方法突破，每一个人都有机会成为更强嘅自己。

由执波开始，到站上世界舞台；由崩溃边缘，到再次突破，吴咏琳用行动证明——真正嘅强大，唔只系技术，而系喺低谷入面，仍然选择相信自己。

相关文章：双重身份嘅坚持｜日与夜之间全力以赴｜袁思伟：追逐目标，成就更好嘅自己

相关文章：逆境中成长．用心打每一球｜谭竣颢：排球唔只系运动，而系我嘅人生导师

相关文章：飞越沙池．突破纪录｜陈铭泰：有时最重要唔系完美准备，而系正确心态。

相关文章：跳过高度．跨越无悔｜钟慧欣：跳高比赛以失败嘅最后一杆作结，却令人想再跳一次。

相关文章：一剑一念．心战无悔｜梁千雨：请记得尽情享受追梦嘅过程，搏尽无悔。

相关文章：一球一念．挑战高墙｜江卓轩：由「型」开始，打出全运会历史佳绩。

相关文章：坚持搏尽．踢出高峰｜卢蔚丰：跆拳道教我自信乐观，改变咗我嘅人生

相关文章：由街场到启业活化：香港街篮精神与城市创意