一来一回之间，考验嘅从来唔只系速度。细细一张球枱，短短几秒已足以改变整场比赛节奏；旋转、落点、节奏变化，每一下都充满未知。正正系呢种瞬息万变嘅刺激感，成为港队乒乓球运动员 李凯敏 最享受乒乓球嘅地方。快到有时要靠本能反应，但同时亦讲求极细腻嘅技术、控制力同心理质素。每一板波背后，其实都藏住判断同博弈，而往往胜负，就取决于嗰一瞬间嘅选择。

而佢同乒乓球嘅缘分，其实系由姐姐开始。细个时，姐姐先去学打波，李凯敏就经常跟住妈妈去接放学。睇住姐姐练波、比赛，见到粒波飞来飞去，节奏又快又刺激，慢慢令佢对呢项运动产生兴趣。成长路上，李凯敏遇到一位对佢影响好深嘅教练。对方虽然严格，但一直都好有耐性，亦不断鼓励佢进步。细个参加区际比赛同全港年龄分组赛时，开始拎到唔少奖项，成绩带畀佢更大信心，亦令佢更加想突破自己。「慢慢我入咗青少年队，最后决定走全职竞技嘅路。」自此，佢正式踏上全职运动员之路，向更高水平挑战。

不过，成为运动员之后，真正困难嘅地方先至开始。乒乓球对速度、反应同技术要求极高，每一次训练都讲求细节。对李凯敏嚟讲，最艰难嘅挑战，系心理同技术要同时取得平衡。「技术上要不停微调，拍面角度、步法节奏同发力点，任何细微改变都会影响回球。」但最难嘅，往往系当你尝试改变时，心理压力亦会随之放大。怕失误、怕辜负教练、亦怕自己努力白费，呢种压力，相信好多运动员都感同身受。

佢特别提到，有段时间自己曾经想转用新球拍。平时训练时明明用得唔错，但一到正式比赛前，就总系会犹豫，甚至想转返用旧拍。「其实唔系块板决定胜负，而系我点样去适应佢、相信自己去作出改变。」后来佢开始学识，与其不停谂结果，不如专注返每一下动作嘅感觉。当心态慢慢调整好，压力反而减少，新球拍嘅表现亦逐渐稳定返。呢段经历，亦令佢真正明白：「技术可以练，但心态先至系决定表现嘅关键。」

今年一月，李凯敏喺中东出战国际赛期间，赛前两日突然收到爷爷离世嘅消息。「嗰阵真系好沮丧，好想即刻返香港。」不过屋企人一句：「返唔到就喺场上赢返嚟，赢畀佢睇，唔好放弃。」成为咗佢最大力量。带住对家人同爷爷嘅思念上场，最终佢成功击败国家队对手。对平时甚少喺国际赛击败国家队球员嘅佢嚟讲，呢场胜利别具意义。「当下觉得好似爷爷一直喺我身边支持我。」呢一场，亦成为咗佢最难忘、最值得骄傲嘅比赛之一。

展望未来，李凯敏对自己亦有清晰目标。短期希望今年喺世锦赛打出理想成绩，同时争取入选亚运会同世界杯。除咗成绩之外，佢更加希望建立更强信心，学识喺比赛中更稳定咁为自己打气。至于长远目标，佢希望将自己嘅打法特点进一步强化，将自己做得好嘅部分精益求精，同时逐步弥补弱点，令整体表现更全面、竞争力更强。「我最想做到嘅，系喺大赛都可以保持冷静、自信，唔畀压力影响自己发挥。」对佢而言，每一次训练、每一场比赛，都系验证自己、突破自己嘅过程。

最后，李凯敏亦想将一番说话送俾所有努力追梦嘅年轻运动员。「做运动员最重要系坚持同用心。」佢认为：「练习要有计划，将大目标拆成细小可达成嘅阶段性目标；技术要稳扎稳打，唔好急于求成，细节决定成败。」运动员生涯一定有高低起伏，但最重要系唔好因为一次失败就否定自己。「You don’t lose, you learn!」跌低唔可怕，可怕嘅系失去再站起身嘅勇气。最后，记得保持对乒乓球嘅热爱，当真正享受过程，进步就会更加稳定而持久。

由跟姐姐去睇练波，到今日站上更高水平舞台，李凯敏一直用行动证明，真正嘅成长，唔系从来无失误，而系每一次怀疑自己之后，仍然愿意相信自己、重新出发。

相关文章：由执波开始嘅梦想｜压力之下打出突破｜吴咏琳：团魂可以创造奇迹

相关文章：双重身份嘅坚持｜日与夜之间全力以赴｜袁思伟：追逐目标，成就更好嘅自己

相关文章：逆境中成长．用心打每一球｜谭竣颢：排球唔只系运动，而系我嘅人生导师

相关文章：飞越沙池．突破纪录｜陈铭泰：有时最重要唔系完美准备，而系正确心态。

相关文章：跳过高度．跨越无悔｜钟慧欣：跳高比赛以失败嘅最后一杆作结，却令人想再跳一次。

相关文章：一剑一念．心战无悔｜梁千雨：请记得尽情享受追梦嘅过程，搏尽无悔。

相关文章：一球一念．挑战高墙｜江卓轩：由「型」开始，打出全运会历史佳绩。

相关文章：坚持搏尽．踢出高峰｜卢蔚丰：跆拳道教我自信乐观，改变咗我嘅人生

相关文章：由街场到启业活化：香港街篮精神与城市创意