【羽毛球｜事业上的好伙伴】

对于香港羽毛球代表伍家朗嚟讲，羽毛球唔单止系一项运动，更加系佢事业上最重要嘅伙伴。由细到大，佢都热爱羽毛球，而真正令佢成为专业运动员，系因为羽毛球带畀佢无可取代嘅满足感：「当我喺比赛中赢到自己认为好强、好难打嘅对手，嗰种满足感真系无可比拟，令我更有信心、更有动力去继续挑战自己。」

每位运动员都有属于自己嘅高光时刻，伍家朗最骄傲嘅，莫过于喺国际赛场上攞奖同击败强劲对手。呢啲成就唔单止证明咗佢嘅实力，仲成为佢继续努力嘅动力：「当你赢到一场自己认为好艰难嘅比赛，会觉得自己所付出嘅努力值得，亦会令自己更想突破更多界限。」

作为顶尖运动员，训练当然唔简单，特别系当面对未知：「好多时未必肯定自己练嘅嘢系咪真系对比赛有帮助，或者方向啱唔啱，呢种迷惘都系最大挑战之一。」但经验话畀佢知，解决方法就系通过不断比赛、总结经验，然后再改良训练方法，确保自己向住正确方向进步。

近年香港体育发展有进步，资源亦有所增加，但伍家朗认为，运动员嘅训练可以更科学化，令表现更有效率。此外，推广羽毛球最重要嘅，系喺社区层面做更多：「可以喺学校搞多啲羽毛球活动，或者增加民间比赛，令大众有更多机会参与，从而提升整体羽毛球水平。」

「未来仍然会继续做运动员，未有退役计划。」伍家朗亦有鼓励年轻球员：「如果真系有羽毛球梦，就要早啲认清自己嘅目标，仲要以专业运动员嘅心态去面对训练，因为越早打好基础，成功机会就越大。」

伍家朗用实力同拼搏精神，写下属于自己嘅羽坛传奇。期待佢继续为香港羽毛球坛创造辉煌！

相关文章：陈浩源：「我要成为我理想中嘅人！」