陈浩源：「我要成为我理想中嘅人！」
【从低谷到世界巅峰嘅轮椅羽毛球梦】
「我要成为我理想中嘅人！」—— 面对体能极限、社会误解，香港残疾羽毛球代表陈浩源用汗水改写轮椅羽毛球嘅历史，畀世界睇到残疾运动员嘅专业同价值！
意外改变人生，羽毛球带佢重新企番起身，并成为世界级运动员！佢由绝望中寻找希望，坚持16年，打破界限，攞下2面残奥奖牌、2面亚帕运奖牌、6次帕拉羽球世锦赛奖牌，为香港残疾羽毛球写下辉煌一页。
「羽毛球对我嚟讲，就系信仰。喺我最低谷、觉得自己无价值嘅时候，羽毛球令我搵返自信，搵返人生意义。」意外受伤，令佢嘅人生瞬间跌落谷底，甚至一度迷失方向。但当佢重新接触羽毛球后，发现自己即使坐喺轮椅上，只要有公平规则同合适工具，依然可以发挥实力！佢更决定成为香港第一位轮椅羽毛球选手，并将呢项运动推上国际舞台。
（图片来源：受访者提供）2009年，受伤复健两年后，陈浩源仅训练9个月，就参加全港周年羽毛球赛冠军赛，竟然一举夺冠「呢个冠军，唔单止系一个奖项，更系重新认识自己嘅开始。佢令我相信——只要肯努力，即使身体有障碍，都可以发光发亮！」凭住呢份信念，佢一步步打入世界顶尖行列，更创下历史，成为香港首位轮椅羽毛球两届残奥运奖牌得主。
「通常一个运动项目由零开始，需要几代人努力先可以攞到世界级成就。但我用咗16年，由0去到101！」佢深信：「坚持，会创造奇迹。当所有人都话你发紧梦，你最后要证明，发梦嘅人唔系你，而系你嘅坚持，改变咗世界。」
轮椅羽毛球唔只系「坐住打波」咁简单！相比其他轮椅运动，轮椅羽毛球运动员必须自己推动轮椅，每一下移动都消耗大量体力，体能要求极高。作为运动员，佢每日都要进行极严格嘅训练，甚至比一般残疾运动员更辛苦：「有啲人觉得残疾运动员唔够专业，因为无受体制化训练。但好多健全运动员认识我哋后，先发现——原来真正嘅专业，唔系由身份决定，而系由态度决定。」
香港残疾运动员嘅支援待遇虽然全球领先，但陈浩源希望残疾运动唔应该只属于精英运动员，而应该让更多普通残疾人士都可以参与！「日本、韩国都有专为残疾人士设计嘅运动设施，但香港虽然有无障碍运动场，但依然要同健全人士共用，使用上有一定困难。我希望未来可以成立专属伤残人士健身中心，令所有身体有特殊需要嘅人，都可以安全、自在地运动。」
（图片来源：受访者提供）作为曾经站上最高舞台嘅运动员，陈浩源未来希望培养更多年轻运动员，推动轮椅羽毛球发展。佢认为，这项运动目前面临青黄不接嘅危机，因此希望鼓励更多年轻人投入：「香港人可以攞到残奥奖牌，证明香港有能力发展呢项运动，希望佢哋可以接力将呢项运动发扬光大。」
对年轻运动员的建议：「千祈唔好谂住行捷径，因为呢项运动根本无捷径。你未必一定要攞奖牌，但最重要系，每日嘅训练，你都对得起自己！」
「搏尽无悔，真正意思唔系攞到奖之后话自己搏尽，而系即使攞唔到奖，但你已经用尽全部努力，都可以坦然面对自己。」
