【香港家书】政治漫画家 尊子
2016-01-09

Hi Lim,

早排你由新加坡来港渡假,我带你去行山,一面行一互道近况。你好自然问到我香港近年新闻自由、言论自由有乜变化。

我话:有!大陆愈来愈打压啦,传媒愈来愈自律啦、河蟹横行通街走啦…….

你一句窒埋嚟:唓,你咪日日喺度画你嘅漫画?!又唔见你失业领综援?!!

Err….

唉,每日一步嘅退缩,细微嘅变化,加埋遮遮掩掩嘅包装,一时间真系好难三言两语说明俾外人知。

哈,好咯!!呢几日发生咗嘅「铜锣湾书店股东离奇失踪案」,以此做例,以后我一讲你就明咯!!

五条书局友,出版中国政坛揭秘书,攞正牌照做生意,边会有事?点知消失一个又一个,逐个失踪!最后一条,在香港光天化日下竟亦人间蒸发消失埋!!家人报案,警察不理,传媒报导,全城哗然,事情发酵,政府回应,差佬做嘢,向北查询,碰得一鼻子灰,霎时六神无主。擦鞋政客,趁机扑出表演护主打完场,以乌贼战术,诬蔑苦主嫖妓又走私,愈描愈黑,拍案惊奇。

 

好彩内地官腔传媒够大方,做咗唔怕认:系呀!吹咩?拉咗嘞!点吖?!!吓死你未?!!

传媒记者,慢慢从各方消息,砌起拼图,结论是恐怖过史提芬京、好笑过差理卓别灵、曲折过 J. K. Rowling,离奇过张爱玲,衰过日本仔拉壮丁。

Lim,我知你又会话:唓,我哋新加坡够冇言论自由啦,一样拉啲异见人士喎,冇影响新加坡学童嘅英语能力,大学排名仲升咗添,高过你地香港……..。

但阿 Lim, 你地新加坡可以「自己公民自己拉」,冇「跨境拉人」呢啲嘢噃。如果马来西亚忽然捉咗个新加坡人去,我谂两国打仗都似!!当年卢沟桥事变,都系由「失踪人口」引起,结果中日大战,你同我都差啲做咗日本「皇民」。

好彩,或者当年起草基本法嘅人够聪明,讲明「国防、外交」,香港冇份,无可能引起战争。你估中国军队会向天九十度角发射飞弹然后等佢跌落嚟自己炸自己咩?

我地香港特首「爱国英」,一向强调中港合作,配合国家施政,积极参与一路一带,所以如果你发现将来一地两检,原来系方便带路捉人嘅话,一啲都唔意外呀。将香港冇犯法嘅市民送去过关,挥手自兹去,啸啸斑马鸣,一幅好凄美感人嘅画面!讲到尾,特首都系人,都要为自己嘅前途打拼,下届能否连任,同建制派嘅立法会议员一样,靠嘅就系呢啲关键时刻站稳队伍嘞。

Lim,话晒你哋新加坡系全世界独裁国家嘅榜样,想问下你,贵国嘅「强力部门」嘅编制系点样?隶属军队?警察?情报?消防?律政定海关?能够「规避法律」又懂心战攻防,应该好威猛。

不过,香港喺中国特别行政区,冇「强力部门」设立,全部都系由梁粉爱国立法会同区议员兼任,接受西环领导,本事唔细,间中甩辘,资源无限,最叻霸位,又会教市民扮渔民出海出入境可以规避海关,又识用护老院登记法催谷选票,面皮厚、嘴巴油。有咗佢地,警察挥棍殴打途人都有力D。

书店五友失踪,已引起书店同业恐慌,已经有书商收起「禁书」唔卖。长远嚟讲,我都为嗰D唔卖禁书嘅老板担心。因为世事无常,政治嘅嘢一天都嫌长,我哋点知薄熙来公子何时东山再起,或者佢啲粉丝一朝得势,到时回过头来秋后算帐──当年边个唔肯卖习总情史书嘅,都是反动派!到时冇卖禁书嘅书商失踪一个又一个,香港特区人口渐渐减少,市面零售业都会受影响,你话几咁可怜。

美国一个脑神经科医生Oliver Sacks 写过几本书,描述神经受损病人的病历,反覆提及人类大脑的神奇适应功能,某部份知觉缺失,便会自动发展另一部份能力以作补偿,个案好鬼有趣。中国人尝唔到言论自由滋味,于是补偿发展了味觉,专注烹调嘅精巧,舌尖嘅享受。下次你嚟香港,会发现香港嘅美食又进一筹,自不待言。

下次见,Bye!

Best Regards,

尊子

2016年1月9日

 

 


【香港家书】

香港电台第一台FM92.6 - 94.4

星期六早上九点至九点二十分

监制 : 陈燕萍

学者、议员、官员及社会人士透过书信形式,分析社会现象,细诉个人感受。

专题分类:专题文章
发表评论

最新专题