【十万八千里】美国华盛顿州现「大虎头蜂」
2020-05-10

如果你平时见到蜜蜂,都会左闪右避;咁遇上最近在美国华盛顿州出现的「大虎头蜂」,一定会更加恐慌。

「大虎头蜂」原本生于东南亚、中国大陆南方以及台湾;上年12月首次喺美国被发现,现时数量数以百计。科学家估计,佢地有可能系经由国际货运「偷渡」至华盛顿州港口,亦有可能系有人刻意咁做。



「大虎头蜂」有个呈橙黄色嘅大头,腹部有黑色和黄色嘅条纹。佢地身长可达6.4厘米,相当于成年人食指咁长;毒刺长6亳米,养蜂人常着嘅防护装备亦可轻易刺穿,更加有「亚洲杀人蜂」之称。

一般蜜蜂伤人一次之后,自己亦会随之而死亡;但「大虎头蜂」可以针人好多次,加上佢地体型大,可以释出大剂量毒性强烈嘅毒液,令伤口周围局部坏死;如果多次被刺中,坏死嘅细胞同毒液更会进入血液、影响器官甚至致命。喺日本,全国平均每年有30至50人因而死亡。

不过喺一般无受威胁嘅情况下,「大虎头蜂」并唔会攻击人类;佢地最大嘅目标系蜜蜂。《国家地理杂志》指出,一小群「大虎头蜂」,就可以喺90分钟内,占据原有数千只蜜蜂的蜂巢,之后更会将幼蜂嘅身体咬烂做富有营养嘅糊状物,喂饲自己嘅幼虫。

蜜蜂被大举纤灭,会严重危害农业和生态平衡。国际养蜂业联会指出,全球大约三分一食物需要靠蜜蜂授粉生产;按美国农业部估计,单喺美国,蜜蜂授粉生产嘅作物总值更高达150亿美元。由于美国本土蜜蜂数量不足,所以每年都要由澳洲、新西兰、墨西哥等地进口大量蜜蜂授粉,疫情下大量航班取消,进口量已经大受影响;「大虎头蜂」出现并屠杀美国蜜蜂,可谓雪上加霜。

华盛顿州农业部目前已着手设计数百个陷阱,期望可以捉拿「大虎头蜂」嘅蜂后同工蜂,阻止佢地交配并占据更多地域。昆虫学家指出,如果几年内唔能够令「大虎头蜂」喺美国绝迹,佢地的足迹将遍布全国。


【十万八千里】

主持:陆宇光、谭永晖、高福慧
编导:高福慧
监制:陆宇光

【十万八千里】六十分钟陪你走遍世界
逢星期六上午11时至中午12时FM92.6香港电台第一台

专题分类:国际追踪
发表评论

最新专题