李乐诗博士 Dr. Rebecca Lee Lok Sze

极地科学工作者

2017-08-25

上个星期同大家分享过芬兰准备试行无人驾驶巴士，对于呢个咁先进嘅北欧国家，大家对佢嘅认识唔知有几多？又会唔会知今年正正就系芬兰独立100周年呢？虽然独立日，亦即系芬兰嘅国庆系喺12月6日，但系独立100周年嘅活动已经开始左。

为了纪念芬兰意义非凡嘅一年，芬兰政府投入左1900万欧元（即系超过1.7亿港元）举办各项活动，由年头到年尾无间断咁进行，总计大约有3000场大大小小嘅庆祝活动，包括扩大举行芬兰知名嘅冰泳、桑拿文化「芬兰浴」，同埋设立第40座国家公园「胡萨国家公园」，作为建国百年嘅礼物等等。

除左自己送礼物俾自己之外，芬兰嘅好邻居挪威先前亦有送大礼嘅谂法，而呢份「贺礼」更被誉为系「地表最强礼物」，呢份礼物就系将两国交界处嘅哈尔蒂亚峰嘅顶峰送俾芬兰，将芬兰全国最高点推高。虽然，方案最终因为牵涉太多复杂嘅法律问题而搁置，但系通常讲到领土问题，都系会争持不下，各自声称地方系属于自己，好难得挪威嘅民众竟然慷慨到会想将领土送出去，或者我地都好应该学习一下呢一个全世界最幸福快乐嘅国家，对人慷慨一点，对事物放开一点，或者生活就会开心一点。

唔知今晚嘅嘉宾蔡惠娴同学喺芬兰做交换生嘅时候，又有无偷D时间去挪威走一走？又有无领悟到快乐之道呢？听下李乐诗博士仲有MiuMiu夏妙然，同蔡同学倾下喺芬兰游学嘅体会！

(照片由蔡同学提供)

在森林生活犹如童话故事般梦幻，但蔡同学在芬兰游学时实现了。