"Yes, I do love you. And I don’t love you." — 呢句对白系电影《世上最烂的人》(The Worst Person in the World)嘅女主角茱莉（Julie）同男朋友艾克索（Aksel）讲分手时讲出嘅一句台词。
喺电影入面，茱莉一直透过艾克索呢个「他者」去确认自我价值 —— 当呢位有才华嘅漫画家肯定佢嘅写作，佢先觉得自己系「好」。
但同时，艾克索唔只界定茱莉嘅文采，亦惯性定义佢嘅感受。其中一个例子系，当茱莉表达自己唔开心嘅时候，艾克索会界定佢之所以唔开心系因为出于无办法得到佢爸爸嘅认同。久而久之令茱莉觉得喺呢段关系入面做唔到自己，好似连表达情绪都不被允许。
于是就出现咗呢句矛盾嘅对白：「我爱你，但亦都唔爱你」—— 佢依赖对方嘅认同，但被否定情绪时又觉得窒息。呢种拉扯正正就系茱莉选择分手嘅原因。
咁莫非要对方不断称赞、肯定，持续俾到情绪价值，我哋先至可以同「他者」建立一段良好嘅关系？
