李乐诗博士 Dr. Rebecca Lee Lok Sze

极地科学工作者

2017-08-11

问下大家一个问题，如果每个月唔洗做野都可以有一笔固定嘅收入，足以支付基本生活所需，咁你觉得你仲会唔会想返工呢？

问大家呢条问题并唔系一时兴起，而系同今晚去游学听我讲嘅地方—芬兰好有关系，因为今年芬兰展开左一项历史性嘅社会福利实验，喺无任何附带条件下，为2000名随机挑选、年龄介于25-58岁嘅失业人士，每个月提供一笔大约5000港元嘅「基本收入」，去支付基本生活所需。呢笔钱会取代其他社会福利金，即使日后佢地搵到工，仍然可以持续收到呢笔款项。

实验为期两年，首要目的系促进就业！听起上黎可能有D匪夷所思，唔做野都有钱收，点解可以鼓励到人去搵工做呢？但系芬兰政府认为咁样喺某程度上系可以令更加多人愿意投入劳动市场，原因系喺现有嘅政策底下，一旦失业嘅人搵到工，即使只系临时工，佢所领取嘅救济金都可能会减少，变相降低左失业人士搵工嘅动力。所以，如果无论有工做定无工做都有一笔基本收入，咁就唔会再有人为左失业救济金而唔搵工做。

其实，近年黎，基本收入已经逐渐成为左世界一股新趋势。瑞士旧年亦都曾经考虑引进，打算每月提供俾成年公民相当于接近20000港元嘅保证收入，但瑞士人公投否决左相关计画。而苏格兰、加拿大、冰岛、乌干达周巴西都有讨论推出类似嘅方案。

听到呢到，大家可能都会有个疑问，既然钱会自动到手，人唔系应该会变得更懒散？会放弃工作？点解呢个「基本收入」嘅福利政策，好似完全无考虑过人系有惰性呢一面呢？

之不过，人之所以唔想返工，系真系因为懒，定还是可以提供基本收入嘅个份工根本上唔系自己嘅兴趣，而有兴趣嘅工又未必可以足够基本收入呢？又或者，换个问法，假设你唔需要为左赚取生活费，而勉强去接受唔适合或者无太大兴趣嘅工作，可以根据自己嘅兴趣同能力投身相应嘅行业，你又肯唔肯定你会拣返依家呢份工去做呢？

未有答案，唔紧要，因为芬兰嘅研究都系刚刚开始，两年后，答案或者会更清晰：至于自己心底里面嘅答案，当然要靠自己寻找，去游学就系寻找自己嘅好方法。唔知呢位嘉宾去到芬兰游学又搵唔搵到自己想搵嘅野呢？听下李乐诗博士&MiuMiu夏妙然同今晚嘅嘉宾蔡惠娴同学倾下佢喺芬兰游学嘅体会啦！

(照片由被访者提供)

黎到芬兰，除左学芬兰语，当然亦要睇极光啦！